ÍRB með mörg gull á Gullmóti KR

Það var aldeilis kraftur í sundmönnum ÍRB á Gullmóti KR um helgina. ÍRB sópaði til sín verðlaunum, og sundfólkið okkar var nánast á verðlaunapalli  í öllum greinum í öllum flokkum. Miklar og góðar bætingar  litu dagsins ljós og heilt yfir skartaði liðið góðri liðsheild og þéttleika , því í sumum greinum áttum við öll þrjú verðlaunasætin. Við áttum 14 fulltrúa í Super Challenge keppninni sem fram fór á laugardagskvöldinu. Þar áttum við nánast allan riðilinn í  flokki meyja 12 ára og yngri, eða alls fimm af átta keppendum. Helstu afrek okkar fólks á mótinu voru eftirfarandi: Eydís Ósk Kolbeinsdóttir var í öðru sæti yfir stigahæsta sundfólk mótsins, ásamt því að fjögur mótsmet  voru slegin af okkar fólki.  Mótsmetin  settu Þröstur Bjarnason í 400m skriðsundi í opnum flokki, Sunneva Dögg Friðriksdóttir í 200 flugsundi í flokki  15- 17 ára, Sólveig María Baldursdóttir í 100m flugsundi í flokki 12 ára og yngri, og Fannar Snævar Hauksson í 50m skriðsundi í flokki 12 ára og yngri.